Paytaxtın Nərimanov rayonunda yerləşən 5 saylı Uşaq Klinikasında uşağın ölüm faktı qeydə alınıb. Bu haqda bu gün, 3 iyul tarixində Bakuplus.az məlumat verir.
Həkim Mehriban Cəfərova 5 yaşlı Mirbəhram Vəkillinin dişini çıxardığı zaman uşağın halı qəfildən pisləşib. Bir müddət sonra oğlan dünyasını dəyişib.
TƏBİB-dən bildirilib ki, 2024-cü il iyulun 1-də günorta saatlarında M.Vəkillinin valideynləri 5 saylı Uşaq Stomatoloji Klinikasına müraciət ediblər.
Müvafiq müayinələrdən sonra ona tibbi xidmət göstərilib, uşaqda yuxarı azı dişinin periodontiti diaqnozu ilə dişin əməliyyatı həyata keçirilib. Dişin çıxarılmasından sonra uşaq anafilaktik şok keçirib. Ona tibb müəssisəsində ilkin tibbi yardım göstərilib və təcili tibbi yardım briqadası çağırılıb.
Təcili yardım həkimləri çağırışdan 15 dəqiqə sonra klinikaya gəlsə də, uşağın valideynləri təcili yardımı gözləmədən oğullarını yaxınlıqda yerləşən bir sıra özəl klinikalara aparıblar.
Bir neçə özəl tibb müəssisəsi azyaşlını qəbul etməkdən imtina etdiyi üçün valideynlər uşağı Kliniki Tibbi Mərkəzin təcili yardım şöbəsinə gətiriblər. Reanimasiya tədbirlərinə baxmayaraq, onun həyatını xilas etmək mümkün olmayıb.
“Valideynlərin dediklərinə görə, uşaq ürək qüsurundan və autizmdən əziyyət çəkirdi”, – deyə TƏBİB-dən bildirilib.
