Bakıda bir neçə gün əvvəl Yasamal rayonu, Mətbuat prospektində Dövlət Yol Polisinin avtomobilini qəsdən vuran sürücü həbs edilib. Bu haqda bu gün, 21 may tarixində Qafqazinfo məlumat verib.
Gecə saat 00:30 radələrində “Saipa Saina” markalı avtomobilin sürücüsü 37 yaşlı Fuad Ovadoğlu yol hərəkəti qaydalarını kobud şəkildə pozub. O, yol polisinin “dayan” əmrinə tabe olmayaraq hərəkətini davam etdirib və bununla da fövqəladə vəziyyət yaradıb. 10 dəqiqədən sonra hüquq-mühafizə orqanlarının əməkdaşları Mətbuat prospekti ilə S.Dağlı küçəsinin kəsişməsində qanun pozucusunu saxlamağa çalışıblar.
Təqib zamanı F.Ovadoğlu idarə etdiyi avtomobili qəsdən DYP-nin xidməti avtomobilinə çırpıb, nəticədə hər iki nəqliyyat vasitəsinə ciddi ziyan dəyib. Araşdırmalar nəticəsində həmin şəxsin sərxoş vəziyyətdə olduğu məlum olub.
Qanunu pozan şəxs barəsində protokol tərtib edilib. Yasamal rayon məhkəməsinin qərarı ilə F.Ovadoğlu 20 sutka inzibati qaydada həbs edilib.
