Bakıda şirkətə məxsus kiçiktutumlu yük avtomobilinin sürücüsü yol hərəkəti qaydalarını kobud şəkildə pozub. Bu haqda Xəzər Xəbər məlumat verib.
Sürücü Balaxanı yolunda baş vermiş tıxacda gözləməmək üçün əks yola çıxaraq hərəkətə davam edib.
Yol hərəkəti üzrə ekspert Elməddin Muradlı bildirib ki, həmin vətandaş həm özü, həm də digər sürücülər üçün təhlükəli vəziyyət yaradıb. Ekspert, həmçinin əlavə edib ki, əgər bu mallar vacib mallar deyilsə, yük maşınlarının gündüz saatlarında şəhərə yük daşıması qadağan edilməlidir.
Bakı şəhər Dövlət Yol Polisi İdarəsinin baş inspektoru Araz Əsgərli bildirib ki, video sosial şəbəkələrdə və internet portallarında yayılan kimi, məsələ dərhal nəzarətə götürülüb və qanunvericiliyə uyğun olaraq müvafiq tədbirlər görüləcək.
