Binəqədi rayonu, Rəsulzadə qəsəbəsi, 7B ünvanında yerləşən fərdi yaşayış evi qəzalı vəziyyətə düşüb. Bu haqda bu gün, 20 dekabr tarixində Bakuplus.az ATV-yə istinadən məlumat verir.
Ərazidə yerləşən çoxmərtəbəli binanın inşası zamanı yaxınlıqdakı evin divarlarında iri çatlar yaranıb. Evin sahibi Sevinc Həsənovanın sözlərinə görə, binaların bünövrəsi qoyularkən silkələnmədən onun evinə ziyan dəyib.
Binanın rəhbərliyi dəymiş zərəri qarşılamaq üçün qadına 1000 manat pul verib. Lakin qadın həmin məbləğlə problemin həll olunmadığını qeyd edib.
Nazim adlı tikinti şirkətinin rəhbəri Sevinc Həsənovanın iddiaları ilə razılaşmayıb. Onun sözlərinə görə, hadisə 5 il əvvəl baş verib. Qadına pulla yanaşı, ustalar da verilib. Hazırda, 5 il keçəndən sonra tikinti şirkəti qadının heç bir xərcini qarşılamağa hazır deyil.
