Paytaxtda və ölkə ərazisində qanunsuz odlu silah-sursat saxlayan narkotacirlər və dələduzluqla məşğul olanlar saxlanılıblar. Bu haqda bu gün, 27 iyul tarixində Bakuplus.az Daxili İşlər Nazirliyinə (DİN) istinadən xəbər verir.
Keçirilən əməliyyat tədbirləri nəticəsində qanunsuz odlu silah-sursat saxlayan 3 nəfər saxlanılıb. Onlardan “Kalaşnikov” avtomatı, daraqlar və 103 ədəd patron aşkarlanıb.
Narkotiklərin dövriyyəsinə qarşı həyata keçirilmiş əməliyyatlar zamanı isə əvvəllər məhkum olunmuş Diyanət Ağadadaşov, Tərlan Cəfərov, tanışı Aygün Hacıyeva və Məhəmməd Abuşov saxlanılıblar. Baxış zamanı həmin şəxslərdən ümumilikdə 26 kiloqram marixuana, heroin, metamfetamin, həmçinin 51 ədəd kultivasiya yolu ilə xüsusi qulluq edilərək yetişdirilən çətənə kolu aşkarlanaraq götürülüb.
M.Abuşovun narkotik vasitələrin qanunsuz dövriyyəsi ilə məşğul olmaqla yanaşı, özünü dövlət orqanlarının vəzifəli şəxsi kimi təqdim edərək vətəndaşların maddi vəsaitlərini dələduzluq yolu ilə ələ keçirdiyi də müəyyən edilib.
Faktlarla bağlı Baş İdarədə cinayət işləri başlanılıb, saxlanılan şəxslər barəsində məhkəmənin qərarı ilə həbs qətimkan tədbirləri seçilib.
