15 sentyabr tarixində Bakının Xətai, Qaradağ və Nəsimi rayonlarında xəsarətlə nəticələnən 4 yol-nəqliyyat hadisəsi baş verib.
Xətai rayonunda 22 yaşlı Rəşad Ağayevin idarə etdiyi motosiklet avtomobillə toqquşub. Nəticədə Ağayev xəsarət alıb və xəstəxanaya yerləşdirilib. Müayinə zamanı ona sol bazu sümüyünün yerdəyişən sınığı diaqnozu qoyulub.
Xətaidə baş vermiş digər qəzada iki avtomobil toqquşması nəticəsində 33 yaşlı Elnur Ömərov xəsarət alıb. O, təcili tibbi yardım ilə xəstəxanaya çatdırılıb.
Qaradağ rayonunda 7 yaşlı Nəzrin Əliyeva yolu keçən zaman “QAZel” markalı avtomobil tərəfindən vurulub. Yaralı xəstəxanaya aparılıb. Müayinə zamanı ona baş, üz və bədənin digər nahiyələrinin çoxsaylı sıyrılmış yaraları diaqnozu qoyulub.
Daha bir hadisə Nəsimi rayonunda qeydə alınıb. Təcili tibbi yardım maşını çağırışa gedərkən digər avtomobillə toqquşub. Qəza zamanı tibb bacısı 54 yaşlı Aybəniz Əhmədli xəsarət alıb. O, xəstəxanaya yerləşdirilib və müayinədən sonra ona sağ mil sümüyünün yerdəyişən sınığı və bədənin müxtəlif dərəcəli əziyi diaqnozları qoyulub.
