Bakı sakinləri Bakı-Quba-Rusiya ödənişli avtomagistralında ağır yol qəzasına uğrayıblar. Bu haqda bu gün, 25 iyul tarixində Bakuplus.az Report-a istinadən xəbər verir.
Hadisə yolun 153-cü kilometrində - Xaçmaz rayonunun Hülövlü kəndindən keçən hissəsində qeydə alınıb. Sözügedən ərazidə “Chery” markalı avtomobil idarəetmədən çıxaraq aşıb. Daha sonra isə həmin ərazidə yolun kənarında dayanmaq istəyən “KİA” markalı maşına arxa hissəsindən “Chevrolet” markalı nəqliyyat vasitəsi çarpılıb.
Nəticədə Bakı sakinləri: 31 yaşlı Gülgün Rəfiyeva, 9 yaşlı Fatimə Rəfizadə, 72 yaşlı Güldəstə Hüseynova, 34 yaşlı Güldəstə Hüseynova və 45 yaşlı Ədibə Huseynova müxtəlif dərəcəli xəsarətlər alıblar.
Həmçinin baş verən qəzada Sumqayıt sakinləri: 14 yaşlı Aylin Sərdarlı, 18 yaşlı Məryəm Əliyeva, 14 yaşlı Əli Ömər xəsarət alıblar.
Yaralılar ilkin tibbi yardım göstəriləndən sonra yaşayış ünvanları üzrə həkim nəzarətinə göndəriliblər. Onların Şimal bölgəsinə istirahətə getdikləri bildirilir.
Hadisə yerinə polis əməkdaşları cəlb olunublar, zəruri istintaq tədbirləri aparılır.
