Binəqədi rayonu, Süleyman Sani Axundov, 2 ünvanında sakinlər soyuq havalarda istiliksiz qalıblar. Buna səbəb binanın bütün kommunikasiya xətləri zirzəmidən keçir, zirzəmi isə naməlum şəxslər tərəfindən zəbt olunaraq bağlı saxlanılır. Bu haqda bu gün, 20 yanvar tarixində Bakuplus.az İTV-yə istinadən məlumat verir.
Zirzəmidə kafe tikildiyi deyilir. Sakinlər iddia edirlər ki, tikinti işlərinə ötən il dekabrın 29-dan başlanılıb.
Kommunikasiya xətləri binanın zirzəmisindən keçməsi ilə yanaşı, sakinləri narahat edən digər problem tikinti zamanı binanın özül daşlarının sökülməsidir. Yerlilər hesab edirlər ki, zəlzələ baş verərsə, o zaman bina uça bilər.
Tikinti işlərini aparan şəxs isə əksini deyir. Özünü Ramin kimi təqdim edən şəxs hazırda ərazidə heç bir iş aparılmadığını və bundan sonra da aparılmayacağını bildirdi. Zirzəmidə kafe deyil, anbar tikilməsinin nəzərdə tutulduğunu vurğulayan şəxs bina sakinlərinin narazılığı səbəbindən tikintinin təxirə salındığını dedi.
Binəqədi Rayon İcra Hakimiyyətinin mənzil kommunal təsərrüfat birliyindən də deyilənlər təsdiqlənib. Qurumun baş mühəndisi Vəli Əliyev bildirdi ki, Əmlak Məsələləri üzrə Dövlət Komitəsi zirzəmiyə sənəd verərsə, orada hər hansı iş aparıla bilər. Amma hələ ki belə bir sənəd yoxdur.
