Paytaxt ərazisində sosial şəbəkələr vasitəsilə dələduzluq edən daha bir şəxs saxlanılıb. Bu haqda bu gün, 27 iyul tarixində Bakuplus.az Daxili İşlər Nazirliyinə (DİN) istinadən xəbər verir.
Sabunçu Rayon Polis İdarəsinin 13-cü Polis Şöbəsi əməkdaşlarının keçirdikləri tədbir nəticəsində yaxın qohumlarının müalicəsinə təcili pul lazım olması adı ilə yaşlı nəslin nümayəndələrinə zəng edən və onların pul vəsaitlərini ələ keçirən 46 yaşlı paytaxt sakini Serqey Karnauxov saxlanılıb.
S.Karnauxov “Telegram” sosial şəbəkəsində xarici ölkələrdə yaşayan naməlum şəxslərin ona göndərdiyi ünvanlara gedərək, onlara yaxın qohumlarının başına bədbəxt hadisə gəldiyini bildirib və yardım göstərilməsi üçün onlardan pul tələb edib. Törətdiyi əməllər nəticəsində saxlanılan şəxs ümumilikdə 3 nəfərə 43.000 manat maddi ziyan vurub. S.Karnauxov pulu əldə edəndən sonra “Telegram”da əlaqə qurduğu şəxslərin kriptovalyuta hesablarına köçürüb. O, ələ keçirdiyi məbləğin bir qismini özünə götürüb. Araşdırma zamanı onun paytaxtın Nəsimi rayonunda da analoji əməllər etdiyi müəyyən edilib.
Faktlarla bağlı araşdırmalar davam etdirilir.
Qeyd olunanları nəzərə alaraq, bir daha vurğulayırıq ki, bu hallarla bağlı vətəndaşlar diqqətli olsunlar, daxil olan zənglər üzrə verilən məlumatları dəqiqləşdirsinlər, tanımadıqları şəxslərə qəti şəkildə pul vəsaitləri verməsinlər.
