Mədəniyyət Nazirliyi tərəfindən Mərkəzi İncəsənət Məktəbində yoxlamalar aparılıb, rəhbərliyin işində ciddi nöqsanlar aşkar olunub. Bu haqda bu gün, 6 iyul tarixində Bakuplus.az Lent.az-a istinadən məlumat verir.
Verilən məlumata görə, məktəbin direktoru Əziz Qarayusifli illərlə orada çalışan müəllimlərə dərs yükünü pul qarşılığında verib, yaxud həmin qazancdan müəyyən bir vəsaiti mənimsəyib.
Qarayusifli pozuntulara görə tutduğu vəzifədən azad edilib. Toplanmış materiallar hüquq-mühafizə orqanlarına göndərilib.
Daha öncə məlum olub ki, Qara Qarayev adına Mərkəzi İncəsənət Məktəbinin rəhbərliyində kadr dəyişikliyi olub. Mədəniyyət naziri Adil Kərimlinin müvafiq əmrinə əsasən, sənətşünaslıq üzrə fəlsəfə doktoru Könül Hüseynova məktəbin direktoru təyin edilib.
Həmçinin Baş prokuror yanında Korrupsiyaya qarşı Mübarizə Baş İdarəsi Müslüm Maqomayev adına Azərbaycan Dövlət Akademik Filarmoniyasında əməliyyat keçirib.
