Bakıda keçmiş polis əməkdaşına hökm oxunub. Bu haqda 7 yanvar tarixində Report xəbər verib.
2021-ci ilin fevral ayında narkotik istifadəçisi olan İbad Quliyev söyüş üstündə tanışı Ehtiram Hüseynovu öldürüb. O, Hüseynovun boğazına yumruqla bir zərbə vurub. Həmin vaxt Ehtiramın qıcolması tutub, o, yerə yıxılıb və başı asfalta dəyib. Daha sonra Ehtiram ayılıb, amma halsız vəziyyətdə olub. Sabahkı gün isə o ölüb.
İbad Quliyev barəsində Cinayət Məcəlləsinin “Qəsdən sağlamlığa ağır zərər vurma ölümə səbəb olduqda” maddəsi ilə ittiham irəli sürülüb və məhkəmənin qərarı ilə o, 9 il müddətinə azadlıqdan məhrum edilib.
Quliyev 2008-ci ildən 2015-ci ilə qədər Yasamal Rayon Mühafizə Polisində polis nəfəri vəzifəsində işləyib.
