Paytaxtın Sabunçu qəsəbəsi, Elşən Mehdiyev küçəsində yaşayan sakinlər artıq uzun illərdir ki, burada mərkəzləşdirilmiş kanalizasiya şəbəkəsinin olmamasına görə çətinlik çəkirlər. Bu haqda ATV Xəbər reportaj hazırlayıb.
Sakinlər bildirir ki, evlərdən çıxan kanalizasiya suları yollara axır, və bu da ətrafda antisanitar vəziyyət yaradır. Qəsəbədə mərkəzi şəbəkə olmadığından, hər kəs məcburiyyətdən öz qapısında quyu qazaraq evdən çıxan suyu ora axıdır. Bu isə isti yay aylarında üfunət qoxusunun ətrafa yayılmasına səbəb olur və ərazidə xoşagəlməz mənzərə yaranır.
Sakinlərin iddialara görə, yağış yağanda vəziyyət daha da çətinləşir. Yollar təmamilə keçilməz olur. Quyulara yığılan suyun çəkilməsi isə ayrı bir problemdir.
Məsələ ilə bağlı “Azərsu” ASC-dən bildirildi ki, ərazidə mərkəzləşdirilmiş tullantı su infrastrukturu mövcud deyil. Abşeron yarımadası üzrə hazırlanmış baş plana əsasən, bütün yaşayış məntəqələrində yeni infrastrukturun yaradılması nəzərdə tutulub. Proses yekunlaşandan sonra sakinlərin problemi bir dəfəlik həllini tapacaq.
