Bakıda silahlı şəxs kafedə qadına hücum edib. Bu haqda BakuPlus.az Oxu.az-a istinadən bu gün, 29 aprel tarixində xəbər verir.
Aprelin 29-na keçən gecə Sabunçu rayonu, Maştağa qəsəbəsində yerləşən kafelərin birini işlədən Ləman Heydərova Teymur adlı şəxsin sərxoş vəziyyətdə bıçaqla onu və kafenin işçilərini hədələyərək 1000 manat pul tələb etməsi, obyektin şüşələrini sındırması, işçilərdən birinə isə bıçaqla xəsarət yetirərək oranı tərk etməsi ilə bağlı polisə şikayət edib.
Axtarış tədbirləri nəticəsində həmin şəxsin yeri aşkarlanıb.
Ona yaxınlaşmaq istəyərkən polislərə bıçaqla hücum edən şəxs avtopatrul maşınını zədələyib. Bu zaman polis əməkdaşları tabel silahından havaya iki dəfə xəbərdarlıq atəşi açıblar.
Silahlı müqavimətini davam etdirən şəxsi polis ayaq nahiyəsinə atəş açaraq zərərsizləşdirib.
Polis əməkdaşları tərəfindən ilkin tibbi yardım göstərilən yaralı xəstəxanaya yerləşdirib.
Hadisəni törədənin şəxsiyyəti məlum olub. O, əvvəllər üç dəfə məhkum olunmuş Maştağa qəsəbə sakini 49 yaşlı Teymur Yolçuyevdir.
Hazırda onun vəziyyəti qənaətbəxşdir, həyatına təhlükə yoxdur.
Faktla bağlı cinayət işi başlanılıb.
