Bakıda 17 iyun gecə saatlarında iki yanğın hadisəsi qeydə alınıb. Bu haqda məlumat Fövqəladə Hallar Nazirliyinin (FHN) mətbuat xidməti verib.
Sabunçu rayonunda birmərtəbəli evin dam örtüyünün yanar konstruksiyaları yanıb. Evin qalan hissəsi alovdan mühafizə olunub.
Daha bir hadisə Nəsimi rayonunda çoxmərtəbəli yaşayış binasının birinci mərtəbəsində baş verib. Burada yerləşən elektrik otağında 60 ədəd sayğac və kabel yanıb. Yanğın zamanı binadan 5 nəfər təxliyə olunub. Mənzillər və kommunikasiya xətləri alovdan mühafizə olunub.
Hər iki yanğın FHN əməkdaşları tərəfindən söndürülüb. Xəsarət alan olmayıb.
