Bakının Sabunçu rayonu ərazisində bir nəfər dənizdə boğulub. Bu haqda 8 iyul tarixində Fövqəladə Hallar Nazirliyinin (FHN) mətbuat xidməti məlumat verib.
Hadisə yerinə FHN-in əməkdaşları cəlb olunublar. Nazirliyin dalğıc-axtarış qrupu tərəfindən batan şəxsin meyiti tapılaraq aidiyyəti üzrə təhvil verilib. Həmin şəxsin kimliyi dəqiqləşdirilir.
Qeyd olunur ki, hadisə nəzarətsiz ərazidə, ən yaxın sularda xilasetmə məntəqəsindən təqribən 600 m aralı çimərlikdə baş verib.
Çimərlikdə xoş zaman keçirmək üçün Fövqəladə Hallar Nazirliyi bir sıra təhlükəsizlik qaydalarına əməl edilməsinin vacibliyini bildirir. Belə ki, çimərlikdə qadağandır:
- nəzərdə tutulmamış ərazilərdə çimmək;
- çimmə zonasının işarələnmiş sərhədlərindən kənara üzmək;
- küləkli havada dənizə girmək;
- çimərlikdə gecələmək;
- sərxoş halda çimərlikdə olmaq;
- suda kobud hərəkətlər etmək;
- çimərlikdə balıq tutmaq;
- xilasetmə texnikasından başqa digər qayıq və kiçik gəmilərlə çimərliyə daxil olmaq.
Vacidbir:
- Çimərlikdə uşaqlar nəzarətsiz qalmamalı, xəbərdaredici nişan və lövhələrin göstərişlərinə, xilasedicilərin çağırış və tələblərinə sözsüz əməl edilməlidir;
- Qızmar günəş altında fasiləsiz dayanmaq, hava qaralandan sonra suya daxil olmaq təhlükəlidir.
