Paytaxtın Yasamal rayonunda yerləşən 60 nömrəli məktəbin qarşısında polis əməkdaşı ilə vətəndaş arasında insident baş verib. Bu haqda bu gün, 25 sentyabr tarixində Oxu.az məlumat verib.
Qeyd olunan hadisənin videogörüntüləri sosial şəbəkələrdə yayılıb.
Daxili İşlər Nazirliyilin mətbuat xidmətinin hadisəylə bağlı verdiyi məlumata görə, “Opel Astra” markalı avtomobilin sürücüsü nəqliyyat vasitəsini səhv park etdiyinə görə yol polis əməkdaşları vətəndaşa protokol tərtib ediblər. Buna qarşı çıxan sürücü polisləri təhqir edib, daha sonra özünə xəsarət yetirməyə cəhd edərək guya polislər tərəfindən döyüldüyü görüntüsü yaratmaq istəyib. Polis əməkdaşları isə bunun qarşısını almağa çalışıblar. Videogörüntüdə əks olunan uşaqların qayda pozan sürücü ilə heç bir əlaqəsi yoxdur.
Vətəndaş Polis bölməsinə aparılıb. Araşdırmalar davam edir.
Son sutka ərzində yol polis əməkdaşlarının tələbinə tabe olmayan daha iki sürücü qeydə alınmışdır.
