12 noyabr tarixində axşam saatlarında paytaxtın Yasamal və Sabunçu rayonlarında yanğın hadisələri qeydə alınıb. Bu haqda Fövqəladə Hallar Nazirliyinin (FHN) mətbuat xidməti məlumat verib.
Yasamal rayonunda çoxmərtəbəli binanın 13-cü mərtəbəsində saat 19:00 radalərində ümumi sahəsi 40 kv.m olan mənzilin mətbəxində 6 kv.m sahədə əşyalar yanıb. Hadisə yerinə FHN əməkdaşları cəlb olunub. Tüstülənmiş mənzillərdən 15 nəfər təxliyə edilib. Yanğın söndürülüb, mənzilin qalan hissəsi və digər mənzillər yanğından mühafizə olunub.
Daha sonra, saat 20:00 radalərində Sabunçu rayonunda qarajın içərisində yığılan əşyalar alışıb. Hadisə yerinə FHN yanğınsöndürmə briqadası cəlb olunub, yanğın söndürülüb.
Hər iki halda xəsarət alan olmayıb.
