Dünya klassik musiqisinin şah əsərlərindən biri - görkəmli bəstəkar, Xalq artisti Arif Məlikovun "Məhəbbət əfsanəsi" baleti yarım əsrdən artıq müddətdən sonra Heydər Əliyev Fondunun təşkilatçılığı ilə yenidən müəllifin Vətənində təqdim olunacaq. Bu haqda bu gün, 7 iyul tarixində Bakuplus.az Report-a istinadən məlumat verir.
“Məhəbbət əfsanəsi” baletinin təqdimatı sentyabrın 18-də və 19-da Heydər Əliyev Sarayında olacaq.
Tamaşa məşhur baletmeyster Yuri Qriqoroviçin quruluşunda, tanınmış rəssam Simon Virsaladzenin səhnə tərtibatında nümayiş olunacaq və burada Azərbaycan Dövlət Akademik Opera və Balet Teatrının balet truppası, Azərbaycan Dövlət Rəqs Ansamblının rəqqasları, Bakı Xoreoqrafiya Akademiyasının tələbələri çıxış edəcəklər. Əsər Xalq artisti Yalçın Adıgözəlovun dirijorluğu ilə Üzeyir Hacıbəyli adına Azərbaycan Dövlət Simfonik Orkestrinin ifasında səsləndiriləcək.
Heydər Əliyev Fondu Simon Virsaladzenin orijinal eskizləri əsasında 250 kostyum, dekorasiya və rekvizit hazırlayıb.
Arif Məlikov görkəmli türk şairi Nazim Hikmətin “Fərhad və Şirin” librettosu əsasında “Məhəbbət əfsanəsi” baletini yaratmışdır. Arif Məlikov 1958-ci ildə əsərin üzərində işləməyə başlayıb və iki ilə başa çatdırıb. Baletin premyerası 1961-ci il martın 23-də Leninqrad Opera və Balet Teatrında (indiki Sankt-Peterburq Dövlət Akademik Mariinski Teatrı) olub. Tamaşanın baletmeysteri Yuri Qriqoroviç, rəssamı Simon Virsaladze, dirijoru isə maestro Niyazi idi. 1962-ci ilin iyulunda Azərbaycan Dövlət Akademik Opera və Balet Teatrının səhnəsində əsərin premyerası olub.
Əsər görkəmli xoreoqraflar tərəfindən müxtəlif ölkələrin - ABŞ, Almaniya, Avstriya, Bolqarıstan, Böyük Britaniya, Braziliya, Çexiya, Estoniya, Finlandiya, Fransa, İtaliya, Qazaxıstan, Misir, Özbəkistan, Polşa, Rumıniya, Slovakiya, Türkiyə, Ukrayna, Yaponiya və s. səhnələrində tamaşa qoyulub.
