İyulun 10-da NUR Art House Qalereyasında Azərbaycanın tanınmış rəssam-rejissoru Nazim Məmmədovun xatirə sərgisinin açılışı olub. Bu haqda bu gün, 12 iyul tarixində Bakuplus.az məlumat verir.
Tədbirin təşkilatçıları “Arts Council Azerbaijan” QHT və “NUR Art House”dur. Sərgi Azərbaycan xalqının ümummilli liderinin 100 illik yubileyinə həsr olunmuş “Heydər Əliyev irsi” festivalı çərçivəsində təşkil olunub.
Nazim Məmmədov 1934-cü ildə Bakıda anadan olub. O, 20-dən çox Azərbaycan cizgi filminin müəllifidir. O, həmçinin 40 sənədli filmin çəkilişində iştirak edib. İlk cizgi filmini - "Ayı və siçan"ı (ilk tamhüquqlu Azərbaycan cizgi filmi hesab olunur) 1970-ci ildə çəkib. 1988-ci ildə isə respublikada ilk beşhissəli “Göyçək Fatma” cizgi filmini yaradıb. Sənətkar 2004-cü il oktyabrın 29-da Bakıda vəfat edib. 2013-cü ildə Nazim Məmmədov adına Azərbaycan Animasiya Muzeyi yaradılıb.
Sərgi 11-16 iyul tarixlərində keçiriləcək. Qalereyanın iş saatı 11:00-18:00. Giriş sərbəstdir.
