Bir vaxtlar məşhur və izdihamlı olan kinoteatrlar indi boşdur və ya başqa məqsədlər üçün istifadə olunur. Onların bir qismi özəlləşdirilib, bir çoxu isə ticarət-əyləncə mərkəzləri və digər obyektlərin tikintisi üçün sökülüb. Ən məşhur kinoteatrların bir çoxu hazırda tənəzzüldədir. Həmin kinoteatrlar barədə reportajı Xəzər Xəbər hazırlayıb.
Paytaxtın Nəsimi rayonu, Azadlıq prospektində yerləşən, 1952-ci ildə tikilən "Dostluq" kinoteatrı hazırda özəlləşdirilib. Kinoteatrın fasad hissəsi saxlanılsa da, içi tamamilə dağıdılıb. Kinoteatrın aqibətinin necə olacağı isə məlum deyil.
Nizami rayonu, ''Qara Qarayev'' metro stansiyası yaxınlığında yerləşən, 1970-ci illərdə tikilən ''Təbriz'' kinoteatrının izi də qalmayıb. Kinoteatr özəlləşdirilərək sökülüb, yerində isə ticarət-əyləncə mərkəzi tikilib.
Xətai rayonu, “Əhmədli” metro stansiyasının yaxınlığında yerləşən "Bakı'' kinoteatrında isə nisbətən ürəkaçan mənzərə yaşanır. Kinoteatrın təmirdən sonra yaxın vaxtlarda istifadəyə verilməsi nəzərdə tutulur.
Mədəniyyət Nazirliyindən bildirilib ki, hazırda nazirliyin balansında 8 kinoteatr qalıb. Digər kinoteatrlar isə müxtəlif sahibkarlar tərəfindən özəlləşdirilib.
[caption id="attachment_55010" align="alignnone" width="300"]
Foto Xəzər Xəbər-in rəsmi Youtube kanalı[/caption]
