Bakıda 390 minlik dələduzluq edən bacıların məhkəməsi başlayır. Bu haqda 1 iyun tarixində Oxu.az məlumat verib.
Binəqədi rayon bələdiyyəsinin sabiq sədri Aytac Əliyeva və onun bacısı İlknur Turkut qızıl alveri ilə məşğul olduqları zaman bir neçə nəfərə qarşı dələduzluq ediblər. Belə ki, onlar vətəndaşların birindən 200.000, digərindən isə 189.000 manat pulu dələduzluq yolu ilə ələ keçiriblər. Həmçinin A.Əliyeva Binəqədi rayon bələdiyyəsi adından torpaq sahəsi ayrılmasına dair saxta sənədlər düzəldərək satıb. Hər iki şəxs məhkəmənin qərarı ilə keçən ilin noyabr ayında həbs ediliblər.
Araşdırma zamanı məlum olub ki, bacılar daha 9 nəfərə qarşı dələduzluq edib. Cinayət işi üzrə ümumilikdə 11 zərərçəkmiş var.
A.Əliyeva və İ.Turkuta qarşı Cinayət Məcəlləsinin “Dələduzluq, külli miqdarda ziyan vurmaqla törədildikdə” maddəsi ilə ittiham irəli sürülüb. Cinayət işinin ibtidai istintaqı yekunlaşaraq, baxılması üçün Bakı Ağır Cinayətlər Məhkəməsinə göndərilib.
Aytac Əliyeva Yeni Azərbaycan Partiyası Gənclər təşkilatının sədr müavini və YAP Binəqədi rayon təşkilatının Qadınlar Şurasının sədri olub.
