Bakının Baş Planı layihəsi çərçivəsində paytaxtda bir neçə gölün təmizlənməsi nəzərdə tutulur və onların ətrafında parklar salınır. Amma elə göllər var ki, onların adı layihədə qeyd edilməyib, həmin göllər çirklənib və ya məhv olmaq üzrədir. Bu haqda bu gün, 27 iyul tarixində Bakuplus.az Bakı Gündəliyinə istinadən məlumat verir.
Bakının Sabunçu rayonu, Maştağa qəsəbəsi ərazisində karxananın yaxınlığında göl yerləşir. Sözügedən göldə balıqlar var, lakin yük maşınları daim zibilləri ora atırlar. Həmin nəqliyyat vasitələrinin yerli icra hakimiyyətinə məxsus olduğu bildirilir.
Həmçinin iddia olunur ki, gölün yerində karxana olub, lakin daha sonra çıxan qrunt sularından göl yaranıb.
Oxşar su hövzəsi Bakının Yasamal rayonunda, “Üç Tac” yaşayış kompleksinin ətrafında yerləşir. Əvvəllər gölün sahilində karxana olub. İki il əvvəl bu gölü qurutmaq, yerində hündürmərtəbəli binalar tikmək istəyənlər var idi. Sakinlərin etirazından sonra işlər dayandırılmışdır və ərazidə parkın salınması planlaşdırılırdı.
Ümumiyyətlə, Abşeronun bəzi qəsəbələrində köhnə daş karxanalarının yerində yaranan süni göllər və ətraf ərazi istirahət zonası kimi istifadə olunmalı idi. Lakin hazırda yalnız bir böyük layihə həyata keçirilib - eyniadlı gölün sahilində Böyükşor parkı yaradılıb.
17:10 - Yenilənib
Məsələ ilə bağlı Sabunçu Rayon İcra Hakimiyyətinin nümayəndəsi açıqlama verib.
Onun sözlərinə görə, ərazidə artıq təmizlik işləri aparılıb. Onlar, gölə tullantıların atılması ilə bağlı məlumatlarının olmadığını və bu məsələ ilə məşğul olacaqlarını bildiriblər.
Sabunçu rayonu, Maştağa kənd bələdiyyəsi isə bu məsələyə cavabdeh olmadıqlarını bildirib.
İcra hakimiyyəti başçısının Maştağa rayon nümayəndəliyindən verilən məlumata görə, ərazidə sanitar təmizliyə nəzarət zamanı işçilər tərəfindən “Daş karxanası” adlanan ərazidə naməlum şəxslər tərəfindən tikinti materiallarının tullantıları aşkar edilib: “Bununla bağlı Rayon Kommunal Təsərrüfatı İdarəsi tərəfindən əraziyə texnika və işçi qüvvəsi cəlb olunub, qeyd olunan sahə tullantılardan təmizlənib.
Məlumat üçün onu da qeyd edək ki, göstərilən ərazi qəsəbə sakininin şəxsi mülkiyyətində (Çıxarışla) olan torpaq sahəsidir. Buna baxmayaraq, ərazinin sanitar vəziyyəti nəzarətə götürülüb və bir daha bu kimi xoşagəlməz halların təkrarlanmaması üçün müvafiq tapşırıq verilib”.
