Külli miqdarda dələduzluqda təqsirləndirilən “R-Group Azerbaijan”-ın rəhbəri Rəmiş Cəfərov və onun atası Zəkram Cəfərovun cinayət işi üzrə ibtidai istintaq başa çatıb. Bu haqda bu gün, 23 iyul tarixində APA məlumat verib.
Təqsirləndirilən şəxslər barəsində toplanmış iş materialları Bakı Ağır Cinayətlər Məhkəməsinə göndərilib. Cinayət işi hakim Azər Paşayev tərəfindən baxılacaq.
Cai il fevralın 17-də səhər saatlarında bir neçə “R-Group Azerbaijan” TIR avtomobillərinin sürücüləri Bakının Heydər Əliyev prospektində ikinci dərəcəli yolu bağlayıb və bir neçə saatlıq süni tıxac yaratmışdırlar. Hadisə ilə bağlı R.Cəfərov, sürücülər Mirələm Məmmədov, Bəxtiyar Məmmədov və Elvin Məlikov polis tərəfindən saxlanılmışdır.
Faktla bağlı Nərimanov RPİ-nin İstintaq Şöbəsində “İctimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə” maddəsi ilə cinayət işi başlanıb. Cəfərov 2 ay müddətinə, qalanlar isə 30 sutka müddətinə azadlıqdan məhrum edilib.
Daha sonra məlum olub ki, Rəmiş Cəfərov Belarus vətəndaşı Yuri Qnoyanikə məxsus ümumi dəyəri 37.000 ABŞ dollardan çox olan yükü mənimsəmişdir. Eyni zamanda sürücülərə - Anar İsgəndərov, Elman Əkbərov, İftixar Mehdiyev və Əlikram Məmmədova məxsus ümumilikdə 68.000 ABŞ dolları dəyərində mal və məhsulların daşınmasında onlara maddi ziyan vurduğu üzə çıxmışdır.
