Bakı Nəqliyyat Agentliyi (BNA) sərnişindaşıma şirkətlərinə tapşırıqlar verib. Bu haqda bu gün, 6 sentyabr tarixində Bakuplus.az Report-a istinadən xəbər verir.
Yeni dərs ilinin başlaması ilə əlaqədar, vətəndaşların paytaxta axın etməsi şəhərdə sıxlığın artmasına gətirib çıxarır. Bu halı minimuma endirmək üçün agentlik tərəfindən müvafiq tapşırıqlar verilib.
Belə ki, avtobusların sayı artırılacaq, onların arasında interval sərnişin axınına uyğun olaraq tənzimlənəcək. Həmçinin avtobus sürücülərinin cədvələ riayət etməsi təmin olunacaq.
Bundan əlavə, təhsil müəssisələrinin qarşısında yol nişanları bərpa olunur, zəruri olan yerlərdə yeniləri quraşdırılır.
Qurum vətəndaşları mümkün qədər şəxsi nəqliyyat vasitələrinin istifadəsindən imtina etməyə və ictimai nəqliyyata üstünlük verməyə çağırır.
