Bakıda evlilik vədi ilə vətəndaşdan pul alaraq dələduzluq etməkdə təqsirləndirilən şəxsə hökm oxunub.
Qaynarinfo.az xəbər verir ki, təqsirləndirilən şəxs oğlu ilə birlikdə tanışlarının etibarından sui-istifadə etməklə dələduzluq əməli törətməkdə ittiham olunub.
İttihama görə, onlar subay olduğunu bildikləri zərərçəkmiş şəxsi ailə qurmaq məsələsində kömək edəcəklərinə inandırıblar. Təqsirləndirilən şəxsin oğlu zərərçəkmişi guya tanışları olan şəxslə evləndirəcəklərini bildirib. Daha sonra qız evinə elçiliyə getmək, nişan üzüyü və şirniyyat almaq adı ilə zərərçəkmişdən pul tələb olunub.
Zərərçəkmiş şəxs 1550 manat məbləğində pulu təqsirləndirilən şəxslərə verib. Amma nə elçilik baş tutub, nə də vəd edilən evlilik məsələsi həll olunub. Pulun geri qaytarılması ilə bağlı çoxsaylı cəhdlər nəticəsiz qaldığından zərərçəkmiş hüquq-mühafizə orqanlarına müraciət edib.
Məhkəmənin hökmü ilə amnistiya elan edilib, təqsirləndirilən şəxs cinayət məsuliyyətindən azad olunub.
