Hövsan kanalının Yeni Suraxanı qəsəbəsi yaxınlığından açıq şəkildə keçən hissəsindən ətrafa pis qoxu yayılır.
Bu barədə Bakuplus.az-a qəsəbə sakini Ələddin Xələfli məlumat verib.
Ələddin Xələfli bildirib ki, bu kanalla neft-mədən və çirkab suları axır. O deyib ki, Binədən kanalizasiya suları da bu kanala vurulur.
Xələflinin sözlərinə görə, bütün qəsəbəni üfunət bürüyür: “Yay aylarında qapı-pəncərəni açmaq olmur. Üfunət hər yeri bürüyür. Bu kanal qəsəbənin şimal hissəsində də, 1700 metr məsafədə axırdı. Biz bu məsələni qaldırdıq, müvafiq qurumlar tədbir gördülər, 1700 metr məsafəni üstü bağlı yer elədilər, beton örtüklə örtdülər. Amma kanalın bu hissəsindəki problemi heç kim həll etmək istəmir. Özü də bu neft-mədən və çirkab suları Hövsanda dənizə tökülür. Bütün rəsmi qurumlara müraciət etmişik, “Azərsu” deyir bizlik deyil, kanal “SOCAR”ın balansındadır, onlar da deyir ki, biz artıq ora su vurmuruq. Ekologiya və Təbii Sərvətlər Nazirliyi dəfələrlə gəlib, mənim də iştirakımla əraziyə baxış keçirilib, müzakirələr aparmışıq, onlar da deyir ki, biz ancaq cərimə yaza bilərik, başqa bir imkanımız yoxdur. Qurumların hamısı öz boyunlarından atırlar bu işi. Heç kim məşğul olmaq istəmir. Hələ üstəlik Binədən şambo avtomobillər çirkabı ora boşaldırlar. İydən dayanmaq olmur. Neçə ildir əziyyət çəkirik, əlac edən yoxdur”.
Onu da qeyd edək ki, Ələddin Xələfli problemlə əlaqədar Azərbaycan Respublikası Baş nazirinə də müraciət ünvanlayıb. Baş nazir isə müraciəti araşdırılması üçün Ekologiya və Təbii Sərvətlər Nazirliyinə göndərib. Bundan başqa millət vəkili Sevinc Fətəliyeva tərəfindən də sözügedən nazirliyə müraciət ünvanlanıb.
Nazirliyin 11 saylı Regional Ekologiya və Təbii Sərvətlər İdarəsindən Xələfliyə bir neçə gün öncə göndərilmiş məktubda bildirilir ki, ötən dövr ərzində nazirlik əməkdaşları tərəfindən görülmüş nəzarət tədbirləri zamanı Hövsan kanalına tullantı suları axıdan və kanalı müxtəlif çeşidli tullantılarla çirkləndirən hüquqi, vəzifəli və fiziki şəxslər barəsində inzibati tədbirlər görülüb, bu kimi halların qarşısının alınması üçün qurum tərəfindən aidiyyəti qurumlara müraciət məktubları ünvanlanıb:
“Eyni zamanda Hövsan kanalının “Balakhani Operatinq Company LTD” şirkətinin istifadəsində olduğunu nəzərə alaraq kanalın tullantı suları və qarışıq tullantılarla çirkləndirilməsi hallarının qarşısının alınması məqsədilə onun açıq şəkildə keçən hissələrinin qapalı sistemə keçirilməsi üçün sözügedən şirkətə məktublar göndərilib. Lakin kanalın üzərinin qapadılması istiqamətində heç bir tədbirin görülmədiyi müəyyən edilib. Odur ki, Hövsan kanalından ətrafa yayılan iy-qoxunun və tullantılarla çirkləndirilməsi hallarının qarşısının alınması məqsədilə kanalın Yeni Suraxanı yaxınlığından açıq şəkildə keçən hissəsinin qapalı sistemə keçirilməsi üçün idarə tərəfindən “SOCAR Upstream Management İnternational” MMC-yə məktub ünvanlanıb”.
Kamran Rza
