Binəqədidə məktəbin qarşısındakı avtomobil yolunda piyada keçidinin olmaması sakinlərin narazılığına səbəb olub. Bu haqda 10 fevral tarixində Bakupkus.az-a məlumat daxil olub.
Binəqədi rayonu, 179 saylı tam orta məktəbin giriş qapısı düz magistral yola çıxır. Məktəbə gəlmək üçün isə sakinlər hərəkətin intensiv olduğu yolu keçməyə məcburdurlar. Dərs vaxtı isə, demək olar ki, səhər saat 8:00-dan axşam saat 19:00-a qədər sözügedən yoldan hər dəqiqə uşaqlar məktəbə girib-çıxırlar.
Valideynlər burada uşaqları üçün çox ciddi həyati təhlükənin olduğunu deyirlər. Çünki yolun bu hissəsində nə piyada zolağı, nə də ki təhlükəsizlik nişanı var.
“Burada piyada zolağı yoxdur, avtomobil yoludur, hər an uşaqlarımızı maşın vura bilər”, - valideyinlərin biri narahatlığını bildirib.
