Yaşadığımız müddətdə ən önəmli məsələlərdən biri iş həyatına doğru atılan ilk addımdır. Qarşımıza çıxan vakansiya və iş elanlarını gələcəyə açılan qapı kimi görsək, CV onun açarı rolunu oynayır.
Bəzən günlərlə, hətta aylarla özümüzə uyğun iş axtarışlarına çıxırıq. Tapdıqdan sonra işə qəbul məsələsi başlayır. Burda isə həlledici rolu tərtib etdiyimiz CV oynayır. Amma CV-də səhv varsa, ya da düzgün tərtib olunmayıbsa, həmin qapı bizim üçün bağlı qala bilər.
Maraqlıdır, gələcəyə açılan iş qapısının açarı olan CV necə hazırlanmalıdır?
CV tərtibatçısı Nicat Qarayev Bakuplus.az-a açıqlamasında deyib ki, işəgötürən CV-yə 6-7 saniyə ərzində baxır:
“CV reklamdır. Məsələn, biz məhsulun reklamına baxıb, tanış olub, sonra alırıq. Təbii ki, bacarığı olan şəxslərin CV-si hazırlanır. Sadəcə bacarığı olan, özünü düzgün ifadə edə bilməyən şəxslərin CV-si elə hazırlanmalıdır ki, diqqət cəlb etsin.
İşəgötürən göndərilən hər CV-yə 6-7 saniyə baxır. İlk baxışda onlar CV-nin ümumi tərtibatına, struktura, uyğun açar sözlərə və aydın şəkildə ifadə olunmuş iş təcrübəsinə diqqət edirlər. Bu səbəbdən diqqət çəkməsi üçün onun qısa və konkret, vizual baxımdan səliqəli olması vacibdir”.
İnsan resursları üzrə mütəxəssis Rüfət Hacıyevin fikrincə, ölkəmizdə CV-yə yanaşma düzgün deyil:
“Beynəlxalq təcrübədə namizədin korporativ və kollektivə nə qədər fayda verəcəyinə diqqət ayırırlar. Buna görə də müsahibə mərhələsi CV-dən daha vacib hesab olunur. Çox vaxt deyirlər ki, insanın işə qəbul olunması üçün ideal CV olmalıdır. Lakin CV hər bir şeyi göstərə bilməz.
Bəzən olur ki, insanın çox böyük iş təcrübəsi var, lakin müsahibədə, iş mühitində toksik olsun. Bu zaman həmin insan çox az şans qazanır. Ona görə düşünürəm ki, işi olmayan və iş təcrübəsi az olan şəxslər CV-ni daha dolğun hazırlamalıdır”.
Bu da belə... İşə qəbul prosesi sadəcə CV ilə məhdudlaşmasa da, onun iş həyatında önəmi danılmazdır.
Fidan İlqar
