Azərbaycan Respublikası Mənzil İnşaatı Dövlət Agentliyi (MİDA) tərəfindən inşa edilən “Yasamal” yaşayış kompleksinin ərazisindəki piyada səkiləri və panduslar parkinqə çevrilib. Bu haqda bu gün, 27 avqust tarixində Bakı Gündəliyi səhifəsinə istinadən Bakuplus.az məlumat verir.
Yaşayış kompleksinin sakinləri bildiriblər ki, burada əvvəlcə geniş piyada səkiləri, piyadalar üçün şərait yaradılsa da, hazırda vəziyyət dəyişib. Ərazidə kifayət qədər dayanacaq yerlərinin olmasına baxmayaraq, sürücülər bilərəkdən avtomobillərini evlərinə yaxın səkilərdə saxlayırlar.
Vətəndaşlar Bakı şəhər Dövlət Yol Polisi İdarəsinin və Bakı Şəhər İcra Hakimiyyəti yanında Bakı Nəqliyyat Agentliyinin əməkdaşlarından əraziyə nəzarəti gücləndirməyi, səkilərdə avtomobillərin saxlamasının qarşısını almağı xahiş edirlər. Avtomobillərin piyada yollarında parklanması sakinlərin, o cümlədən uşaq arabası ilə olan qadınların sərbəst hərəkətinə maneə yaradır.
Digər problem kompleksin ərazisində cəmi bir giriş və çıxışın olmasıdır. 9 və 10 saylı marşrut avtobus xətləri də bu yolla hərəkət edir. Giriş-çıxışda hər istiqamətə yalnız bir nəqliyyat vasitəsi yerləşə bilər. Üstəlik, avtomobilləri bu yolda saxlayanda sıxlıq əmələ gəlir, avtobusların hərəkətində gecikmələr yaranır. Bu səbəbdən kompleksin ərazisində ikinci giriş-çıxışın yaradılması vacib hesab olunur.
[URIS id=66268]
