13 fevral məşhur meyxanaçı Məşədibabanın doğum günüdür.
Məşədibaba Aydəmirov 1971-ci ilin 13 fevral tarixində Bakı şəhərinin Maştağa kəndində anadan olub. Uşaq yaşlarından şeirə böyük maraq göstərib. Yüzlərlə şeir, qəzəl, qəsidə müəllifidir. Məşədibaba Aydəmirov uşaq yaşlarından şeirə, sənətə böyük maraq göstərir, şeirlər yazıb. Balaca Məşədibaba bütün vaxtını bədii kitablar oxumağa, şeir yazmağa ayırıb. Məlahətli səsi və şeirləri ilə hər kəsi heyran edən Məşədibaba gənc yaşlarından məşhurlaşıb. İlk meyxana deməyə başladığı dövr isə 1984–1985-ci illərə təsadüf edir. Qısa zamanda kənd camaatı arasında hörmət qazanan meyxanaçı müxtəlif məclislərə dəvət almağa başlayıb. 1991-ci ildə Bakı Dövlət Sirkində keçirilən Azərbaycanda ilk meyxana yarışında üçüncü yeri tutub. Kasıb ailədə böyüdüyü üçün kənddə bir çox imkansızların toyuna təmənnasız gedib.
Məşədibaba 1994-cü ilin 11 fevral tarixində yaxın dostu olan meyxanaçı Elçin Atakişiyev ilə aralarında yaranan münaqişə zamanı ona bıçaq ilə xəsarət yetirib. Elçin xəstəxanaya gec çatdırıldığı üçün normadan artıq qan itirərək dünyasını dəyişib. 6 il dəmir barmaqlıqlar arxasında qalan Məşədibaba 2000-ci ildə həbsdən azad olunub. Əsərlərinin çoxunu isə həbsdə olarkən, yazıb. 2000-ci ildə ailə həyatı qurub, 1 il sonra isə onların Mircəlal adlı övladları dünyaya gəlib. Bir müddət sonra bu xoşbəxt ailə arasında soyuqluq yaranmağa başlayır. İçkiyə qurşanan Məşədibaba ailəsini unudur və 9 il sonra ailəsi dağılır. Həyat yoldaşı və övladı evdən çıxıb gedirlər.
10 yanvar 2011-ci ildə 39 yaşlı Məşədibaba Aydəmirov qayınatasının evinin qarşısında üstünə benzin tökərək özünü yandırıb. O, qonşuların köməkliyi ilə xəstəxanaya yerləşdirilsə də onu xilas etmək mümkün olmayıb.
