Novxanıda dostlar arasında dava olub.
Bakuplus.az-ın əldə etdiyi məlumata görə, hadisənin istintaqı Abşeron Rayon Məhkəməsində keçirilib.
Belə ki, Mehman Qasımov (ad şərtidir) 1969-cu ildə Abşeron rayonu, Novxanı kəndində anadan olub. O, 15 illik dostu olan Xəyalə Məmmədova (ad şərtidir) ilə birlikdə spirtli içki qəbul edib. Yeyib-içdikdən sonra Xəyalə evə getmək istəyəndə, söyüş söyməyə başlayıb. Bununla da aralarında mübahisə yaranıb. Mübahisə zamanı Mehman Xəyalənin başını qapıya vurub.
Nəticədə Mehman Qasımov Azərbaycan Respublikası CM-nin 128-ci (sağlamlığa xəsarət yetirmə) maddəsi ilə təqsirləndirilib.
Təqsirləndirilən Mehman Qasımov ittiham üzrə özünü təqsirli bilərək, ifadəsində göstərib:
“15 ildir ki, Xəyalə ilə dost münasibətindəyik. Hadisə günü, dekabrın 29-u Xəyalə mağazadan bazarlıq edərək, mənim evimə gəldi. Biz birlikdə yemək yeyib və spirtli içki qəbul edirdik. Bir neçə saat sonra Xəyalə getmək istədiyini deyərək, nalayiq ifadələr işlətməyə başladı. Aramızda mübahisə yarandı. Mübahisə vaxtı Xəyalənin sifətinə sillə vurub kənara itələdim. Başı qapıya dəyərək, xəsarət aldı. Əməlimdən peşmanam”.
Məhkəmə iclasında iş üzrə şikayət vermiş zərərçəkmiş Xəyalə Məmmədova bildirib ki, Mehman onu söyüb:
“Təxminən 15 ildir ki, Mehmanla dostuq. Hadisə günü bazarlıq edib Mehmanın evinə getdim. Orada birlikdə spirtli içki qəbul etdik. Evə getmək istədiyimi deyəndə, Mehman mənə söyüş söyməyə başladı. Mübahisə vaxtı o, qəsdən məni kənara itələdi, başım evin qapısına dəyərək yerə yıxıldım. Daha sonra yumruqlamağa davam etdi”.
Beləliklə, məhkəmə tədqiq edilmiş sübutlara məcmu halda hüquqi qiymət verərək Mehman Qasımovu cinayət məsuliyyətindən azad edib. O, qarşı tərəfə dəymiş ziyanı ödəyib.
Fidan İlqar
