Qala qəsəbəsində ata oğlunu kəmərlə döyüb.
Bakuplus.az-ın əldə etdiyi məlumata görə, hadisənin istintaqı Xəzər Rayon Məhkəməsində keçirilib.
Belə ki, təqsirləndirilən Əli Səmədov (ad şərtidir) 1982-ci ildə Qobustan rayonunda anadan olub. O, Xəzər rayonu, Qala qəsəbəsində eyni evdə yaşadığı oğlu Seyid Səmədovu (ad şərtidir) dəri kəmərlə döyüb. Buna səbəb oğlunun məktəbə getməməsi olub.
Əli Səmədov Azərbaycan Respublikası CM-nin 128-ci (sağlamlığa qəsdən zərbə vurma) maddəsi ilə təqsirləndirilib.
Məhkəmədə təqsirləndirilən şəxs qismində dindirilən Əli Səmədov törətdiyi əməli etiraf edib: "Hadisə günü evə gələndə oğlum Seyidin məndən icazəsiz dərsə getmədiyini öyrənib, əsəbiləşdim. Əsəbimdən belimdən açdığım dəri kəmərlə onu döydüm. Əməlimdən peşmanam. Şikayət edən həyat yoldaşım və oğlumla barışdığım üçün cəza verilməməsini istəyirəm”.
Daha sonra məhkəmədə zərərçəkmiş Seyid Səmədov ifadə verib:
“Atam yaşadığımız evdə məktəbə getmədiyimi əsas gətirərək belindən açıb-çıxartdığı dəri kəmərlə bədənimə və ayaqlarıma bir neçə dəfə qəsdən vurdu. Bunun nəticəsində xəsarət aldım. Amma artıq atamla barışmışam. Heç bir şikayətim yoxdur”.
Tərəflərin çıxışından sonra şikayət olmadığı üçün Əli Səmədov məsuliyyətdən azad edilib.
Fidan İlqar
