Bakıda qonşular arasında bıçaqlanma hadisəsi olub.
Bakuplus.az-n əldə etdiyi məlumata görə, hadisənin istintaqı Bakı Ağır Cinayətlər Məhkəməsində keçirilib.
Belə ki, təqsirləndirilən Cavid Quliyev (ad şərtidir) Ramana qəsəbəsindəki yaşadığı məhəllədə qonşuluqda yaşayan tanışı, zərərçəkmiş Əli Vəliyevi (ad şərtidir) görüb. Əli ondan 15 manat borcunu qaytarmasını istəyib. Bu zaman Cavid əsəbiləşərək onu bıçaqla yaralayıb.
Nəticədə Cavid Quliyev Azərbaycan Respublikası CM-nin 126.1-ci (sağlamlığa ağır zərbə vurma) maddəsi ilə təqsirləndirilib.
Məhkəmə iclasında təqsirləndirilən Cavid Quliyev özünü təqsirli bilərək ifadəsində göstərib:
“Hadisə günü işdən evə qayıdan zaman yolda Əlini gördüm. Salamlaşdıqdan sonra məndən 15 manat borcumu nə zaman qaytaracağımı soruşdu. Mən də borcu xatırlamadığımı dedim. Bu zaman aramızda mübahisə yarandı və məni sillə ilə vurdu. Qaşım yaralandığı üçün evə gedən zaman atam nə baş verdiyini soruşanda hər şeyi danışdım. Daha sonra danışıq üçün atamla Əligilin evinə getdik. Söhbət zamanı üzərimdə götürdüyüm bıçaqla Əlini yaraladım. Bıçağı zibil qutusuna atıb oradan uzaqlaşdım. Əməlimdən peşmanam”.
Məhkəmə baxışında zərərçəkmiş Əli Quliyev ifadəsində qeyd edib:
“Cavidlə aramızda normal dostluq münasibətimiz olub. Cavid məndən 2-3 ay əvvəl 15 manat pul aldı. Lakin hər dəfə borcu geri qaytarmasını dedikdə Cavid imkanının olmadığını bildirirdi. Bir dəfə də aramızda olan söhbət zamanı borcu istəyəndə Cavid bıçaqla məni vurdu. Lakin sonradan o, əməlindən peşman olub, üzr istədiyi üçün barışdıq”.
Beləliklə, məhkəmə tədqiq edilmiş sübutlara məcmu halda hüquqi qiymət verərək Cavid Quliyevi təqsirli bilib. Məhkəmənin qərarı ilə o, 3 il müddətinə azadlıqdan məhrum edilib.
Fidan İlqar
