Paytaxtın Sabunçu rayonu, Bakıxanov qəsəbəsi, Əhməd bəy Ağayev küçəsi, 40-11 ünvanında yerləşən “Yay parkı” hasarlanıb. Sovet dövründə tikilən parkda antisanitar şərait hökm sürür, ağaclar kəsilir, ərazidə narkomanlar və evsizlər məskunlaşıblar. Bu haqda bu gün, 27 avqust tarixində Real TV reportaj hazırlayıb.
“Yay parkı” Bakıxanov ərazisində sakinlərin asudə vaxtlarını səmərəli keçirmələri üçün hələ ötən əsrdə inşa edilib. Ərazisində kinoteatr, kafe, istirahət zonaları olan park hər bir sakinin dincəldiyi yer olub. İndi isə bu ərazinin ətrafı daş hasarla hörülüb, girişinə qapı qoyulub və oraya qıfıl vurulub. Bir zamanlar mövcud olan kinoteatrın binası isə sökülüb, bəzi ağaclar qanunsuz olaraq kəsilib.
Bir müddət sonra narkomanlar hasarın bir hissəsini dağıdaraq parkın ərazisində məskunlaşıblar. Onlar ərazidən keçən su borularını partladıb, ətrafı zibilləyiblər. Şikayətçilər deyir ki, evlərinin yanında olan yeganə istirahət guşəsi əllərindən alınıb, uşaqlar məktəbə gedib-gəlmək üçün hasarlanmış parkın ətrafından dolanmalı olurlar, balacalar da oynamağa yer tapmır.
Sakinlərin sözlərinə görə, “Yay parkı” 2005-ci ildə hansısa sahibkara satılıb. Ondan sonra park yararsız vəziyyətə düşüb.
Məsələ ilə bağlı Sabunçu rayon İcra Hakimiyyətindən bildiriblər ki, həmin ərazi şəxsi olduğundan, İcra Hakimiyyəti oraya heç bir müdaxilə edə bilməz. Təmizlik işlərinin aparılması qurum tərəfindən mümkün deyil. Ağacların kəsilməsi məsələsinə gəldikdə isə sahibkar tərəfindən yalnız qurumuş ağacların kəsildiyi əlavə olunub.
[caption id="attachment_66196" align="alignnone" width="800"]
Foto Real Tv-nin rəsmi Youtube kanalı[/caption]
