Heydər Əliyev Fondunun və Səhiyyə Nazirliyinin dəstəyi ilə valideyn himayəsindən məhrum olmuş 28 ukraynalı uşaq Bakıda reabilitasiya olunur. Bu haqda bu gün, 22 avqust tarixində Səhiyyə Nazirliyinin mətbuat xidmətinə istinadən Bakuplus.az məlumat verir.
Səhiyyə Nazirliyinin Sanator-Kurort Reabilitasiya Mərkəzində valideyn himayəsindən məhrum olmuş 7-17 yaşlı 28 ukraynalı uşaq pediatrik müayinədən keçirilib.
Hazırda ukraynalı uşaqlar mərkəzin psixiatr və psixoloqları tərəfindən müayinə olunur. Bundan sonra onlar fizioterapevt və reabilitasiya mütəxəssisi tərəfindən müayinə olunacaqlar. Fizioterapiyaya ehtiyacı olanlara müalicə kursu təyin olunacaq.
Mərkəzdə uşaqların istirahəti üçün hər cür şərait yaradılmışdır. Burada olduqları müddətdə onlar üçün Azərbaycan xalqını və tarixini əks etdirən yerlərə və mərkəzlərə ekskursiyalar təşkil olunacaq.
