“O boşluq çox hiss olunur. Yaşarın (Nuri-red.) yerini heç kəs verməyəcək. Kamal Xudaverdiyevin, Səyavuş Aslanın yerini kim verə bilər? Onlar bir epoxa idi. Gəldilər və getdilər...”
Bu sözləri “Kaspi” qəzetinə müsahibəsində Akademik Milli Dram Teatrının aktyoru, Xalq artisti Kazım Abdullayev deyib.
O bildirib ki, hər dövrün də öz qəhrəmanları var: “Bizdən sonra kimlər olacaq? Artıq yaşlanmışıq. Elə bil institutu dünən qurtarmışıq, amma illər sürətlə ötüb keçdi”.
Kazım Abdullayev səhhətinə yaranmış problemlərdən danışıb: “Ürək cavandır. Ürək işləmək istəyir. Düzdür, mənim ürəyimdə açıq əməliyyat keçirilib. Ürəyimin damarlarını dəyişdilər. Yenə də ürək deyir ki, cavanam. Amma güzgüyə baxanda “haram cavandır?” deyirsən. Bilirsinizmi, aktyorlar bütün rolları ürəklərindən keçirirlər. Ürək bu ağırlığa dözmür. Aktyorların çoxu ürəyindən əməliyyat olunur. Ramiz Məlikov, Rafael Dadaşov ürəklərindən əməliyyat olunmuşdular. Ürək də bizim alətimizdir”.
