Son dövrlər ölkəmizdə azyaşlı uşaqların antibiotikdən, infeksiyadan ölüm halları çoxalıb. Bu isə çox narahatedicidir və ciddi diqqət tələb edir. Antibiotiklərin düzgün istifadə olunmaması, həmçinin sağlamlıq sisteminin müəyyən məsələlərə yetərli reaksiya verməməsi bu cür faciələrə səbəb ola bilər.
Elə ötən gün analoji xəbər İmişlidən gəldi. 4 yaşlı uşaq vurulan antibiotikdən şoka düşərək ölüb. Uşaqlarda antibiotiklərin həkim nəzarəti olmadan istifadə edilməsi çox ciddi nəticələrə yol açır. Xüsusən, antibiotiklərə qarşı allergiya və ya zəhərlənmə reaksiyaları kimi vəziyyətlər ölümə qədər gedə bilər.
Maraqlıdır, ümumiyyətlə, bunun səbəbi nədir? Uşaqlara tibbi müdaxilə düzgün aparılmırmı?
Mövzu ilə bağlı Bakuplus.az-a açıqlama verən həkim-pediatr Qoşqar İsmayılovun sözlərinə görə, ümumiyyətlə antibiotiklərin uşaqlara təyini yalnız və yalnız pediatr tərəfindən təyin olunmalıdır:
“Son zamanlar bu hallara tez-tez rast gəlirik ki, xəstələnin uşağın valideyni r, üç gün özü müalicə aparır və ya aptekdəki satıcı ilə məsləhətləşir. Bəzi valideynlər altı ay öncə uşağına nə antibiotik yazılıbsa, uşağı hər dəfə xəstələnən zaman eyni müalicəni təkrarlayır. Belə hallarda görürsən ki, müxtəlif problemlər ortaya çıxır.
Evdə uşaqlara venadaxili hansısa vitaminlərin köçürülməsi qətiyyən məsləhət görülmür. Bu, yalnız xəstəxana şəraitində aparılmalıdır. Ona görə də məsləhətim odur ki, antibiotiklər və digər dərmanlar da həkim resepti yazıldıqdan sonra istifadə olunsun”.
İnfeksionist Mərdan Əliyev isə qeyd edib ki, bəzən insanlarda dərmanlara qarşı allergik reaksiyalar müşahidə olunur:
“Hər dərmana qarşı allergik reaksiya ola bilər. Amma antibiotiklərə qarşı bu reaksiyalar daha tez-tez müşahidə olunur. Şiddəti də daha yüksək olur. Allergik reaksiya olduqda təcili və təxirəsalınmaz yardım göstərilməlidir. Göstərilmədikdə ölüm ilə nəticələnə bilər. Dərmanlar istifadə olunan zaman bu ehtimal nəzərə alınmalıdır. İynələr xəstəxana şəraitində vurulmalıdır. Şok əleyhinə dərmanlar əl altında olmalıdır. Vaxt itirmək olmaz. Yardım düzgün göstərildikdə, ölüm də olmur.
Dərman inyeksiya olunursa, dərmanın özünə qarşı allergik reaksiya orqanizmdə varsa, bunun artıq tibbi müdaxilə göstərənlə heç bir əlaqəsi yoxdur. Hər qızdırmalı uşağa antibiotikin vurulması düzgün deyil. Qızdırmalı şəxslərdə problem 90 faiz virusla əlaqəlidir. Antibiotiklər isə virusa təsir etmir. Əksinə, dərmanın yan təsirləri var. Əlavə dərmanla orqanizm yüklənir. Bunlar nəzərə alınmalıdır”.
Nəzrin Vahid
