Binəqədi rayonu, Goradil bağ massivində yerləşən, 19-cu əsrə aid tarixi hamam məhv olmaq üzrədir. Bu haqda ATV Xəbər 9 avqust tarixində reportaj çəkib.
Yerli sakinlər bildirirlər ki, Hacı Murad və Əli Murad adı ilə tanınan bu hamamda bir vaxtlar gəlib istirahət ediblər. Amma sonradan baxımsızlıq ucbatından hamam bu vəziyyətə düşüb.
Hamamın divarları dağılmış və uçulmuş vəziyyətdədir. Bir əsrdən çox yaşı olan bu hamamda keçən illər ərzində təmir işləri aparılmayıb. Sakinlər isə bu qədim hamamın tarixdən silinməsini istəmirlər.
“Yaydan yaya istifadə olunurmuş. Karvan yolunun üstündə olduğuna görə insanlar burada kök salmışdılar. Orada dəvələri bağlamaq üçün yerlər də var. Tarixi bir abidə kimi kənd ondan istifadə edib zaman-zaman,” - deyə sakinlərdən biri bildirib.
Mədəni İrsin Qorunması, İnkişafı və Bərpası üzrə Dövlət Xidmətindən bildirildi ki, bu hamam yeni aşkar olunan abidələrin siyahısına daxil edilib. Abidə Nazirlər Kabinetinin qərarına uyğun olaraq dövlət reyestr siyahısına daxil deyil və yalnız həmin siyahıya daxil olunduqdan sonra təmir edilə bilər.
Mədəni irsin Qorunması, İnkişafı və Bərpası üzrə Dövlət Xidmətinin şöbə müdiri Nuridə Allahyarovanın sözlərinə görə, abidənin texniki vəziyyəti nəzərə alınmaqla əhəmiyyətlilik dərəcəsi müəyyən olunur və dövlət investisiya siyahısına daxil edildikdən sonra təmiri və bərpası mərhələli şəkildə keçirilə bilər.
[caption id="attachment_57553" align="alignnone" width="800"]
Foto ATV-in rəsmi Youtube kanalı[/caption]
