Paytaxtın Sabunçu rayonu, Bakıxanov qəsəbəsində quraşdırılmış narahat qaz borusunun yeri dəyişdirilib. Bu haqda bu gün, 8 avqust tarixində Bakuplus.az “Azəriqaz” İB-nin İctimaiyyətlə əlaqələr şöbəsinin rəisi Eldəniz Vəliyevə istinadən xəbər verir.
“Birlik olaraq bu məsələdən xəbərdar idik. Qaz xətti ərazidə fəaliyyət göstərən ticarət mərkəzlərindən biri üçün çəkilmişdi. Baxmayaraq ki, bu xətt podratçı şirkətlərdən birinin "əsəri" idi. Birlik olaraq vətəndaşları narahat edən bu problemin həllini öz üzərimizə götürdük. Xəttin səkinin ortası ilə çəkilmiş 105 metrlik hissəsi tam olaraq kənarlaşdırılıb,” - deyə Vəliyev öz Facebook səhifəsində qeyd edib.
Bundan öncə, 19 mart tarixində adıçəkilən ərazidə qaz xəttinin piyada səkisinin ortasından çəkilməsi məsələsi gündəmdə idi. Daha sonra, bir neçə gün öncə sosial şəbəkələrdə paylaşılan video mövzunu aktuallaşdırmışdır.
