Paytaxtın Balaxanı-Binəqədi yolunun Əliçraq qəsəbəsindən keçən hissəsində sakinlər avtomobil yolunu keçə bilmirlər. Bu haqda bu gün, 21 oktyabr tarixində Bakuplus.az Real TV-yə istinadən xəbər verir.
Adıçəkilən ərazidə nə işıq dirəyi var, nə də müşahidə kameraları. Yolda sürət həddi 60 km/saat olsa da, sürət ölçən cihaz olmadığına görə avtomobillər yüksək sürətlə hərəkət edirlər. Bu səbəbdən də sakinlər yolu keçməkdə çətinlik çəkirlər və hər gün təhlükə ilə üzləşirlər.
Sakinlərin sözlərinə görə, burada, demək olar ki, hər gün yol-nəqliyyat hadisəsi baş verir. Onların əksəriyyəti də ölümlə nəticələnir.
Daxili İşlər Nazirliyindən məsələ ilə bağlı bildirdilər ki, polis əməkdaşları mütəmadi olaraq əraziyə nəzarət edirlər. Sürət ölçən cihazın qoyulması üçün isə sakinlər DİN-ə yazılı müraciət edə bilərlər. “Azərenerji” ASC-dən isə qeyd edildi ki, işıq dirəkləri yaxın zamanlarda quraşdırılacaq.
