Azərbaycanda daha bir qadın həkim səhvinin qurbanı olduğunu iddia edib.
Bakuplus.az xəbər verir ki, bu barədə sosial şəbəkə izləyicilərindən biri paylaşım edib. O, paylaşımında 10 ilə yaxındır ki, kosmetoloq Rəna Sultanovanın səhvi ucbatından əziyyət çəkdiyini bildirib.
“Mən 2016 ci ildən bu günə kimi ayaqlarımla bağlı çox əziyyət çəkdim. Bir qadın kimi, bir insan kimi çox çətin günlər keçirtdim. Bəli, deyəcəksiniz ki, onu edəndə ağlın harda idi? Düzdür, səhv etdim”, - qadın deyib.
Şikayətçi qadının sözlərinə görə, ayaqlarında ləkələrin yarandığını görəndə R.Sultanovaya müraciət edib:
“Edilən prosedurun üstündən 2 il keçmişdi ki, “həkim” xanıma müraciət etdim və bildirdim ki, ayaqlarımda piqmentasiyalar var. Mənə orda ciddi bir şey yoxdur, pişiyim, gəl, mən onu əridəcəyəm dedi.
Nəticədə ondan sonra başıma gəlməyən qalmadı. Süni dolğuya vurulan qialuronidaza, üstünə də pilinqler və nəticə olaraq ayağımdakı dolğu ərimədi, sovrulmadı. Ancaq parçalandı və daha çox yayıldı. Ondan sonrakı günlərim şəkildə gördükləriniz və göstərə bilmədiklərimdir. Özüm baxa bilmirəm!”.
Şikayətçi bildirib ki, bu illər ərzində bircə dəfə də olsun R.Sultanova onunla maraqlanmayıb.
Qeyd edək ki, Rəna Sultanova bir neçə gün əvvəl fəaliyyəti dayandırılan “Laser Beauty Estetik Klinikası” MMC-nin rəhbəridir. Klinikada yoxlama nəticəsində məlum olub ki, tibbi qeydiyyat sənədləri Səhiyyə Nazirliyi tərəfindən təsdiq edilən forma və qaydalar üzrə aparılmır.
