Bakının Qaradağ rayonu, Müşfiqabad qəsəbəsi, Yeni yaşayış massivinin sakinləri antisanitar vəziyyətdən əziyyət çəkirlər. Qeyri-sağlam mühit yaradan zibil poliqonu yaşayış binalarına yaxın ərazidə yerləşir. Bu haqda bu gün, 3 sentyabr tarixində Real TV reportaj çəkib.
Massiv 2000-ci ildən sakinlərin istifadəsinə verilib, lakin bu günə kimi burada məişət tullantıları üçün nəzərdə tutulan bir ədəd belə qutu yerləşdirilməyib. Bu isə massivin minlərlə sakininin tullantıları illər ərzində bura atmasına səbəb olub.
Yerli sakin Bəhruz Çıraqov deyir ki, 2009-cu ildə öz vəsaiti hesabına gənc nəslin sağlam böyüməsi məqsəsilə idman zalı tikdirib. Amma idman zalının bir addımlığındakı üfunət qoxusu ilə sağlamlıq sözü bir araya sığmır.
Sakinlər deyirlər ki, bu problemlə bağlı dəfələrlə qəsəbə bələdiyyəsinə şikayət ediblər. Bələdiyyə tərəfindən ərazi ildə 1 dəfə təmizlənib. Amma zibil qutuları yerləşdirilməyib. Nəticə etibarilə ərazi yenidən əvvəlki görkəminə qayıdıb.
Müşfiqabad bələdiyyəsinin sədri vəzifəsinə yenicə təyin olunan İmamverdi Fəxrəddinov məsələ ilə bağlı bildirib ki, qəsəbənin inzibati ərazi bütövlüyündə zonaların məişət tullantılardan təmizlənməsi mütəmadi olaraq aparılır. Həmçinin o qeyd edib ki, bu gün bununla bağlı dərhal tədbir görülüb. İmamverdi Fəxrəddinov bildirib ki, ərazi təmizləndikdən sonra burada məişət tullantıları üçün nəzərdə tutulan yeşiklər quraşdırılıb.
[caption id="attachment_68188" align="alignnone" width="1024"]
Foto Real TV-nin rəsmi Youtube kanalı[/caption]
