Qış fəsli avtomobil sürücüləri üçün ən çətin dövrlərdən biridir. Qar və buzlu yollarda sürücülər daha diqqətli və hazırlıqlı olmalıdırlar, çünki avtomobillərin idarə edilməsi çox çətinləşir və qəza riski artır. Qar və buzla örtülən yollarda sürüşmə, görünüşün azalması və digər təhlükələr daha çox olur. Bu da ağır fəlakətlərlə nəticələnə bilər.
Bəs, görəsən, nəqliyyat vasitələri qış mövsümünə hazır idimi? Qarlı havada, şaxtada qalan avtomobillərdə hansı problemlər yarana bilər?
Mövzu ilə bağlı Bakuplus.az-a açıqlama verən nəqliyyat məsələləri üzrə ekspert Eldəniz Cəfərovun sözlərinə görə, sürücülərimizin bir qismi qış mövsümünə hazır deyil:
“Nə özləri, nə də idarə etdikləri avtomobilləri qışa hazır vəziyyətdə deyillər. Avtomobilin təkərləri belə hələ yay təkəridir. Qışda qar yağan bir vaxtda yay təkərləri ilə avtomobil idarə etməyə cəhd göstərirlər. Bu da qəzalara səbəb olur. Soyuducu sistemdə xüsusi antifriz məhlulu olmalıdır. Amma onlar sudan istifadə edirlər. Qışda isə su dona bilər. Su donursa, mühərrik də sıradan çıxacaq. Bunu hər bir sürücü bilməlidir.
Düzdür, yaxşı olardı ki, avtomobili qapalı yerdə saxlayasan. Artıq iş-işdən keçibsə, sürücü çatdırmayıbsa, avtomobil şaxtalı havada qalıbsa, bu zaman şaxta bitdikdən sonra mühərriki işə salmağa tələsmək lazım deyil. Bir müddət gözləmək lazımdır ki, həmin o donmuş hissələrin donu açılsın. Buz varsa, əriməyini gözləmək lazımdır. Avtomobili işə salmazdan öncə mütəxəssis dəvət etmək gərəkdir ki, onun tövsiyələri əsasında uzun müddət şaxtada qalmış avtomobilin mühərriki yenidən işə salınsın”.
Avtomobil mütəxəssisi, usta Sahil Ağabəyli isə qeyd edib ki, qar yağdıqda və ya qardan sonra avtomobillərdə fəsadlar yaranır:
“Çünki çalalar qar örtüyü örtülür və avtomobil oraya düşür. Sonra isə avtomobildə ön və arxa işlək hissələrində hansısa səslər gəlməyə başlayır. Bəzən diskin içəridən çatlaması, təkərlərin şiş olması hallar ilə rastlaşırıq.
Qarda nəqliyyat vasitəsini idarə etməyən sürücülər də avtomobillərini daha sonra istifadə etmək istədikdə, mütləq antifrizin mühərrikə zərər verib-verməməsini yoxlamalıdırlar. Ən azı işə salanda yoxlamaq lazımdır. Mühərrikdə kəmərin fırlanıb-fırlanmaması, buzlanmanın olub-olmamasına diqqət edilməlidir”.
Nəzrin Vahid
