Paytaxtın Sabunçu rayonu, Savalan yaşayış massivində şəhid ailələri və qazilər üçün yaşayış kompleksi inşa edilib. Lakin sakinlər bu yeni yaşayış kompleksində antisanitar vəziyyətin hökm sürdüyündən gileylidirlər. Bu haqda bu gün, 1 sentyabr tarixində Bakuplus.az Real TV-yə istinadən məlumat verir.
9 mərtəbəli 12 binadan ibarət olan şəhərcik 576 ailə üçün nəzərdə tutulub. Ancaq kompleks ərazisində zibil atmaq üçün bir ədəd belə konteyner yoxdur. Buna görə də bina sakinləri məişət tullantılarını yaxınlıqda yerləşən boş əraziyə atırlar. Sakinlər deyir ki, günlərlə orada qalan zibillər üfunət saçır və xəstəlik mənbəyinə çevrilir.
Şəhid ailələri və qazilərin problemləri bununla bitmir. Ərazi magistral yoldan uzaq olduğu üçün, bura marşrut xətti açılmayıb. Sakinlər məcbur qalıb 1-2 kilometr məsafəni piyada qət edərək digər avtobusa minməli və yaxud taksi çağırmalı olurlar.
Ərazidə ödəmə və bank terminallarının olmaması da sakinləri narahat edən problemlər sırasındadır.
Şəhid ailələri və qazilərin problemləri ilə bağlı Sabunçu RİH-nin Mənzil Kommunal Təsərrüfat Birliyinin rəsmisi Anar Qalayev bildirdi ki, həmin binalar heç bir qurumun balansında olmadığından bu əraziyə zibil konteynerləri quraşdırılmayıb. Buna baxmayaraq, rayon ərazisi olduğundan həmin ərazi kustar üsulla təmizlənir. Müqavilənin bağlanması üçün Əmək və əhalinin sosial müdafiəsi nazirliyinə müraciət olunub.
Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyindən bildirdilər ki, sözügedən yaşayış binalarının yerli icra hakimiyyətinin balansına verilməsi üçün yekun sənədləşmə işləri aparılır. Yaxın zamanda yaşayış kompleksi Sabunçu rayonu İH-nin balansına veriləcək.
Yeni marşrut xəttinin açılması ilə bağlı Bakı Nəqliyyat Agentliyinin (BNA) rəsmisi Mais Ağayev bildirdi ki, marşrut xəttinin istismarı ilə bağlı daşıyıcı şirkətlərə agentlik tərəfindən müraciət edilib. Hər hansı bir daşıyıcı şirkət tərəfindən müsbət cavab olarsa, marşrut xətti həmin istiqamətdə fəaliyyətə başlayacaq.
