Bakıda sosial ev layihəsi ilə bağlı növbəti dələduzluq faktı qeydə alınıb.
Qaynarinfo.az xəbər verir ki, Bəhruz adlı şəxs qızı üçün sosial ev layihəsi çərçivəsində mənzil almaq istəyən Çingiz adlı vətəndaşa bu məsələdə kömək edəcəyini bildirib. Bunun müqabilində Çingizdən 35 000 manat alıb.
Qeyd edək ki, Bəhruz Nazirlər Kabinetinin şöbə müdiri Qurban Sadıqovun kürəkənidir. O, hətta bu məsələdə Qurban Sadıqovun adından istifadə edib və vaxt qazanmaq üçün pulları şöbə müdirinə verdiyini bildirib.
Zərərçəkmiş aldadıldığını başa düşdükdən sonra hüquq-mühafizə orqanlarına müraciət edib. Faktla bağlı Cinayət Məcəlləsinin 178.2.4-cü maddəsi ilə cinayət işi başlanıb. Bəhruz saxlanılaraq barəsində həbs qətimkan tədbiri seçilib. Cinayət işinin məhkəmə istintaqı Sabunçu Rayon Məhkəməsində aparılıb.
Məhkəmə zamanı məlum olub ki, Bəhruz dəymiş zərəri ödəyib və tərəflər arasında barışıq əldə olunub. Bu baxımdan, məhkəmə ona yüngül cəza təyin edib.
Hakim Samirə Məmmədlinin çıxardığı hökmə əsasən, Bəhruz 6000 manat cərimələnib. Onun ibtidai istintaq müddətində həbsdə saxlanıldığı nəzərə alınaraq, üzərində qəti olaraq 4000 manat cərimə cəzası saxlanılıb. Eyni zamanda, barəsində seçilmiş həbs qətimkan tədbiri dəyişdirilərək, başqa yerə getməmək haqqında iltizam qətimkan tədbiri seçilib.
