Bakının Xəzər rayonunda, “Rahat” marketin qarşısında 4 sentyabr tarixində 9 ədəd şam ağacı kəsilib. Bu barədə məlumat sosial şəbəkələrdə yayılıb.
Verilən məlumata əsasən, ağacların hansı məqsədlə kəsildiyi bilinmir. Onların arasında həm qurumuş, həm də sağlam görünən ağacların olduğu deyilir.
Məsələ ilə bağlı Ekologiya və Təbii Sərvətlər Nazirliyinin (ETSN) əməkdaşları araşdırmalara başlayıblar.
ETSN-in mətbuat katibi İradə İbrahimova bildirib ki, fakt araşdırılıb, müəyyən olunub ki, rayon ərazisində müxtəlif ünvanlarda quru və qəzalı vəziyyətdə olan ağacların götürülməsi ilə bağlı Xəzər rayon İcra Hakimiyyəti tərəfindən Dövlət Ekoloji Ekspertiza Agentliyinə müraciət olunub.
"Rayonun bir neçə yerində, o cümlədən Buzovna qəsəbəsindəki "Rahat" marketin qarşısında agentlik tərəfindən qurumuş şam ağaclarının götürülərək əvəzinə yeni ağacların əkilməsi şərti ilə rəy verilib”, - deyə İbrahimova qeyd edib.
