Paytaxtın Xəzər rayonu, Binə qəsəbəsində baxımsız mikroavtobuslar hər gün 100-lərlə sərnişin daşıyırlar. Bu haqda bu gün, 13 avqust tarixində Bakuplus.az Xəzər Xəbər-ə istinadən məlumat verir.
20-yə yaxın nəqliyyat vasitəsi həm qanunsuz sərnişin daşıyır, həm də texniki tələblərə cavab vermir. Digər avtobus sürücüləri isə mikroavtobusların narahat idarə edilməsindən gileylənirlər.
Mikroavtobusların getdiyi istiqamətdə rahat və qanuni fəaliyyət göstərən nəqliyyat vasitələrinin hərəkət etməsinə baxmayaraq, sərnişinlər qanunsuz avtobuslardan hələ də istifadə edirlər.
Səbəbini soruşanda isə ''Bakıkart''a pul vura bilmədiklərini bildirirlər.
“Aparatlar işləmir. Karta pul vurmaq üçün uzağa getməli oluruq və vaxt itiririk. Biz də məcburuq nağd ödəniş qəbul edən avtobuslardan istifadə edək,” - deyə onlar qeyd edirlər.
Bakı Nəqliyyat Agentliyi məsələ ilə bağlı aidiyyəti qurumlara müraciət edildiyini vurğulayıb. Daxili İşlər Nazirliyi isə bununla bağlı mütəmadi olaraq yoxlamalar keçirildiyini bildirib.
