Bakı-Sumqayıt şosesində, Beynəlxalq Avtovağzalın yaxınlığında xəsarətlə nəticələnən zəncirvari qəza baş verib. Bu haqda bu gün, 14 iyun tarixində APA məlumat verib.
“Mitsubishi” markalı avtomobili idarə edən sürücü qarşısında yaranan maneə səbəbindən qəfil əyləci basıb. Eyni istiqamətdə hərəkət edən “Renault”, “BMW”, “Chevrolet” və “Range Rover” markalı avtomobillər bir-birinə çırpılıb.
Qəza nəticəsində “Chevrolet”-in sərnişini olan qadın xəsarət alıb. Yaralı təcili tibbi yardımın köməkliyi ilə xəstəxanaya çatdırılıb. Hadisə yerinə DYP-nin əməkdaşları cəlb olunub. Nəqliyyat vasitələri cərimə meydançasına yerləşdirilib.
Faktın araşdırılması məqsədilə avtotexniki ekspertiza təyin edilib.
