13 yaşlı yeniyetmə Xətai rayonunda yerləşən Sosial Xidmətlər Agentliyinin tabeliyindəki 3 saylı uşaq evindən qaçıb.
BakuPlus.az xəbər verir ki, Ramal adlı yeniyetmə ARB TV-də yayımlanan “Səni axtarıram” verilişində uşaq evi haqqında ittihamlar səsləndirib.
O, 8 gündür küçələrdə qaldığını deyib:
“Müəllimlər bizi təhqir edir, söyürdülər. Müəssisədəki digər uşaqlara tapşıraraq, tez-tez bizi döydürürdülər. Buna dözmədim və qaçdım”.
Yeniyetmə uşaq evindəki qidalanmadan da şikayət edib:
“Bizə uşaq evində hər gün makaron, quru çörək verirlər. Ət verəndə içindən qurd çıxır. Yeyə bilmirik, qabağımıza atırlar”.
Sosial Xidmətlər Agentliyindən BakuPlus.az-a verilən məlumata görə, 3 saylı Uşaq evi sosial xidmət müəssisəsinin sakini Ramal Rəsulov artıq Sosial Xidmətlər Agentliyinin digər müəssisəsinə yerləşdirilib.
Hazırda Agentlik tərəfindən azyaşlının iddiaları əsasında araşdırma aparılır.
