Daxili İşlər Nazirliyinin Kibercinayətkarlıqla Mübarizə Baş İdarəsi “Instagram”da onlayn qumar təşkil edən şəbəkəni ifşa edib.
Bakuplus.az Daxili İşlər Nazirliyinə istinadən xəbər verir ki, 20 milyon manatdan artıq vəsait toplayan dəstə üzvlərindən 9-u tutulub, 10 milyon manatlıq əmlak və avtomobillər üzərinə həbs qoyulub.
Şəbəkə 30 nəfərdən ibarət olub və iştirakçıları Rusiya, Ukrayna, Türkiyə kimi ölkələrə aid mobil nömrələrdən istifadə edərək, anonim səhifələr açıblar. Onlar “Fast Loto” və “CHCPlay” kimi qeyri-qanuni saytlarda qumar oyunları təşkil edirdilər.
Əməliyyat zamanı 1.157 bank kartı, 2 milyon manat nağd pul və 110 mobil telefon nömrəsi aşkar edilib. Dəstə, qanunsuz vəsaitləri kriptovalyutaya çevirərək xarici ölkələrə 3.375.000 manat məbləğində pul göndərib.
Faktla bağlı cinayət işi açılıb, 9 nəfər həbs olunub. Xaricdə gizlənən üzvlərin tutulması üçün hüquqi prosedurlar başlayıb, əməliyyat-istintaq tədbirləri davam edir.
